English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
|
(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈបើកសិក្ខាសាលាស្តីពីការជំរុញភាពជាដៃគូរវាងវិស័យសាធារណៈ និងឯកជនលើបរិវត្តកម្មនៃការបណ្តុះបណ្តាលបច្ចេកទេស និងវិជ្ជាជីវៈដោយផ្តោតលើចល័តភាពនៃជំនាញប្រកបដោយចីរភាព។ សិក្ខាសាលានេះធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃអង្គារ ទី២៦ ខែវិច្ឆិកា ឆ្នាំ២០២៤ ក្រោមអធិបតីភាព ឯកឧត្តម ប៉ុក ប៉ាន់ រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមនិងតំណាងវិស័យឯកជន និងបណ្តាដៃគូអភិវឌ្ឍន៍ជាតិ និងអន្តរជាតិមកពីប្រទេសអូស្រ្តាលីជាច្រើនស្ថាប័នផងដែរ។
ថ្លែងនៅក្នុងអង្គសិក្ខាសាលា ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា សិក្ខាសាលានេះរៀបចំឡើងក្នុងគោលបំណងបន្តពង្រឹងភាពជាដៃគូរវាងរដ្ឋ ឯកជន និងដៃគូអភិវឌ្ឍន៍ក្នុងការអភិវឌ្ឍវិស័យ TVET នៅកម្ពុជាប្រកបដោយនិរន្តរភាព ចីរភាព ភាពធន់ និងផលិតភាពការងារខ្ពស់ ជាពិសេសក៏ជាឱកាសល្អមួយសម្រាប់ថ្នាក់ដឹកនាំ មន្ត្រីរាជការក្នុងវិស័យសាធារណៈ និងម្ចាស់សហគ្រាស គ្រឹះស្ថានក្នុងវិស័យឯកជន ព្រមទាំងដៃគូអភិវឌ្ឍន៍បានជួបគ្នាដើម្បីពិភាក្សាស្វែងយល់ពីតម្រូវការ បញ្ហាប្រឈម និងធនធានដែលមានស្រាប់នៅតាមស្ថាប័នឬសហគ្រាសនីមួយៗ សម្រាប់ស្វែងរកដំណោះស្រាយ និងវិធីសាស្ត្រល្អៗក្នុងការពង្រឹងកិច្ចសហប្រតិបត្តិការ និងការអនុវត្តកម្មវិធីបណ្តុះបណ្តាលភាពជាដៃគូនេះ។
ឯកឧត្តមរដ្ឋលេខាធិការបន្តថា អង្គសិក្ខាសាលានេះក៏ដើម្បីពង្រឹង និងពង្រីកកម្មវិធីស្ពានចម្លងបន្តជំនាញ, កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត, កម្មវិធីហ្វឹកហ្វឺនកូនជាង, កម្មវិធីបណ្តុះបណ្តាលផ្លាស់ប្តូរជំនាញ, កម្មវិធីបណ្តុះបណ្តាលបង្កើនជំនាញ, កម្មវិធីសិក្សាផ្អែកលើការងារ និងកម្មវិធីបណ្តុះបណ្តាលតាមបច្ចេកវិទ្យាឌីជីថល។ បន្ថែមពីលើនេះ ភាគីពាក់ព័ន្ធក៏អាចពិភាក្សាគ្នាលើកម្មវិធីធ្វើតេស្តទទួលស្គាល់ការសិក្សាដែលមានពីមុន និងសមត្ថភាពបច្ចុប្បន្ន ដើម្បីបើកច្រកក្នុងការទទួលស្គាល់ជំនាញដល់កម្លាំងពលកម្មដែលមានជំនាញ និងអាចបើកច្រកកាន់តែទូលំទូលាយសម្រាប់ការទទួលបានការបណ្តុះបណ្តាលពេញមួយជីវិតផងដែរ៕
#MLVT #HENGSour #TVET |