English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ នៅព្រឹកថ្ងៃទី២២ ខែធ្នូ ឆ្នាំ២០២៥នេះ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្ដម ហេង សួរ រដ្ឋមន្ត្រី ក្រសួងការងារ និងបណ្តុះបណ្តាលវិជ្ជាជីវៈ បានទទួលជួបសំណេះសំណាលជាមួយក្រុមនិស្សិតជ័យលាភីអាហារូបករណ៍រដ្ឋាភិបាលនូវែលសេឡង់ (Manaaki New Zealand Scholarship) មុននឹងនិស្សិតទាំង ៣០នាក់ ចេញទៅបន្តការសិក្សា សម្រាប់ឆ្នាំសិក្សា ២០២៦-២០២៧។
នៅក្នុងពីធីសំណេះសំណាលដ៏ស្និទស្នាលនេះ លោកជំទាវរដ្ឋលេខាធិការប្រចាំការ បានសម្ដែងការអបអរសាទរយ៉ាងខ្លាំងចំពោះប្អូនៗនិស្សិតទាំងអស់ ព្រមទាំងបានលើកឡើងថា ការរៀនសូត្រគឺជា «សមរភូមិពិតប្រាកដ» របស់ប្អូនៗ ដូច្នេះត្រូវយកចិត្តទុកដាក់ក្រេបជញ្ជក់ចំណេះដឹងឱ្យបានច្រើនបំផុត ដើម្បីត្រឡប់មកជួយកសាងប្រទេសជាតិវិញនាពេលអនាគត។
ទន្ទឹមនឹងនេះ លោកជំទាវក៏បានដាស់តឿនឱ្យនិស្សិតទាំងអស់គប្បីចៀសវាងការបញ្ចេញមតិជ្រុលនិយមតាមបណ្ដាញសង្គម ប៉ុន្តែផ្ទុយទៅវិញត្រូវប្រើប្រាស់ចំណេះដឹង និងភស្តុតាងប្រវត្តិសាស្ត្រច្បាស់លាស់ ដើម្បីការពារការពិតរបស់កម្ពុជាដោយសន្តិវិធី។ អ្វីដែលសំខាន់បំផុតនោះ គឺត្រូវជឿជាក់លើព័ត៌មានផ្លូវការពីក្រសួងការបរទេស ឬស្ថានទូត និងត្រូវរួមសាមគ្គីគ្នាជាធ្លុងមួយ ដើម្បីកុំឱ្យចាញ់បោកការញុះញង់ដែលនាំឱ្យមានការបែកបាក់។ ក្នុងនាមជានិស្សិតដែលទៅសិក្សានៅក្រៅប្រទេស ប្អូនៗត្រូវធ្វើជាទូតសុច្ឆន្ទៈដែលបង្ហាញពីភាពថ្លៃថ្នូរ និងវប្បធម៌ដ៏ល្អផូរផង់របស់ខ្មែរដល់អន្តរជាតិ។
សូមបញ្ជាក់ថា សម្រាប់អាហារូបករណ៍រដ្ឋាភិបាលនូវែលសេឡង់ (Manaaki New Zealand Scholarship) ឆ្នាំសិក្សា ២០២៦-២០២៧ នេះ មាននិស្សិតជ័យលាភីសរុប ៣០ រូប ដែលក្នុងនោះ ២៦រូប សិក្សាថ្នាក់អនុបណ្ឌិត និង ៤រូប សិក្សាថ្នាក់បណ្ឌិត។ មុខជំនាញដែលពួកគេត្រូវសិក្សា រួមមាន វិស័យកសិកម្ម ការប្រែប្រួលអាកាសធាតុ ថាមពលកកើតឡើងវិញ និងអភិបាលកិច្ចជាដើម ដែលសុទ្ធសឹងជាជំនាញសំខាន់សម្រាប់ជំរុញការអភិវឌ្ឍនៅកម្ពុជា និងពង្រឹងទំនាក់ទំនងរវាងប្រជាជនកម្ពុជា និងនូវែលសេឡង់ឱ្យកាន់តែជិតស្និទ្ធ៕
#MLVT #HENGSour
