English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
|
(ភ្នំពេញ)៖ ឯកឧត្តម ងុយ រិទ្ធ រដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ពីការយកចិត្តទុកដាក់ខ្ពស់របស់ក្រសួងការងារ និងបណ្តុះបណ្តាលវិជ្ជាជីវៈ ក្នុងការផ្តល់នូវឱកាសឱ្យបងប្អូនសេដ្ឋកិច្ចក្រៅប្រព័ន្ធមកទទួលការបណ្តុះបណ្តាលជំនាញវិជ្ជាជីវ: និងបច្ចេកទេស ក៏ដូចជាទទួលបាននូវការការពារសិទ្ធិទទួលបាននូវសេវារកការងារធ្វើ និងផ្តល់នូវកិច្ចគាំពារសង្គមផងដែរ ដើម្បីជួយឱ្យបងប្អូនមានជីវភាពកាន់តែធូរធារ មានមុខរបរ និងការងារ មានប្រាក់ចំណូលសម្រាប់ទ្រទ្រង់ជីវភាពគ្រួសារកាន់តែប្រសើរ ហើយទទួលបាននូវកិត្តិយស សេចក្តីថ្លៃថ្នូរលើមុខរបរ និងការងារ។
ការថ្លែងដូចនេះ ក្នុងពេលដែល ឯកឧត្តម ងុយ រិទ្ធ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវ: បានអញ្ជើញជាអធិបតីក្នុងពិធីសន្និបាតសាមញ្ញស្តីពីការបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់សមាគមទ្រទ្រង់សេវាកម្សាន្ត និងសេដ្ឋកិច្ចក្រៅប្រព័ន្ធនៅកម្ពុជា (ស.ស.ក) កាលរសៀលពីថ្ងៃទី១១ ខែមករា ឆ្នាំ២០២៥ នៅភោជនីយដ្ឋាននាគមាស៣ ស្ថិតនៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ដោយមានវត្តមានចូលរួមពីមន្រ្តីជំនាញជាន់ខ្ពស់របស់ក្រសួងការងារនិងបណ្តុះបណ្តាលវិជ្ជាជីវ:, សមាជិកក្រុមប្រឹក្សារាជធានីភ្នំពេញ តំណាងរដ្ឋបាលខណ្ឌទាំង១៤, ដៃគូអង្គការ សមាគម និងសមាជិកសមាគមសរុបប្រមាណ ១៦០នាក់។
នាឱកាសនោះ ឯកឧត្តម ងុយ រិទ្ធ បានថ្លែងការកោតសរសើរចំពោះការរីកចម្រើនយ៉ាងឆាប់រហ័សរបស់សមាគមក្នុងការពង្រីកសមាជិកបានកើនឡើងដល់ ៤,៣៣៦នាក់ (ស្រី២,៤៩៨នាក់) ទីតាំងសេវាកម្សាន្តកើនដល់ ២៥៣ ទីតាំង ក្នុងនោះភោជនីយដ្ឋាន និង KTV មានចំនួន ២១៥, បៀហ្កាឌិន ចំនួន ២៤, ក្លិបកម្សាន្ត ចំនួន ១២ និងឌិស្កូតែក ចំនួន ២។ ជាមួយគ្នានេះ សមាគមក៏បាននិងកំពុងចូលរួមយ៉ាងសកម្មក្នុងសកម្មភាពស្របតាមគោលនយោបាយរបស់រាជរដ្ឋាភិបាលកម្ពុជា ចំពោះការគិតគូរយកចិត្តទុកដាក់ខ្ពស់ដល់បងប្អូនសេដ្ឋកិច្ចក្រៅប្រព័ន្ធ ជាពិសេសអ្នកបម្រើការក្នុងផ្នែកសេវាកម្សាន្ត។
ឯកឧត្តម ងុយ រិទ្ធ ក៏បានផ្តល់អនុសាសន៍មួយចំនួនដល់សមាគម ដូចជា៖ - ត្រូវខិតខំបង្កើនជំនឿទុកចិត្តពីសមាជិកដោយបម្រើផលប្រយោជន៏ជូនសមាជិកតាមទិសដៅផែនការដាក់ចេញប្រកបដោយផ្លែផ្កាទាំងបរិមាណ គុណភាព និងប្រសិទ្ធិផល។
- ពង្រីកសមាជិកថ្មីឱ្យបានកាន់តែច្រើនដើម្បីមានសំឡេងកាន់តែខ្លាំងក្នុងការចូលរួមធ្វើជាភាពតំណាងក្នុងវិស័យសេដ្ឋកិច្ចក្រៅប្រព័ន្ធ។ - ត្រូវបន្តចូលរួមជំរុញការអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស និងកម្មវិធីរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់បុគ្គលស្វ័យនិយោជន៏ និងអ្នកនៅក្នុងបន្ទុកសមាជិក ប.ស.ស.។ - បន្តចូលរួមផ្សព្វផ្សាយគោលនយោបាយរបស់រដ្ឋាភិបាលអំពីយុទ្ធសាស្រ្តជាតិស្តីពី អភិវឌ្ឍន៏សេដ្ឋកិច្ចក្រៅប្រព័ន្ធ ឆ្នាំ២០២៣-២០២៨។ - បន្តបង្កើនទំនាក់ទំនងសហប្រតិបត្តិការជាមួយដៃគូអភិវឌ្ឍន៏ ស្ថាប័នរដ្ឋ អង្គការក្រៅរដ្ឋាភិបាលប្រកបដោយប្រសិទ្ធភាព ដើម្បីគាំទ្របេសកកម្មសមាគមបម្រើសមាជិក។ - បន្តកិច្ចសហការជាមួយក្រុមការងារទទួលបន្ទុកសេដ្ឋកិច្ចក្រៅប្រព័ន្ធខណ្ឌ ដើម្បីបង្កើនសកម្មភាពនិងផ្តល់សេវាកម្មទាក់ទងនឹងការបណ្តុះបណ្តាលជំនាញវិជ្ជាជីវៈ បណ្ណមូលនិធិសុខាភិបាល កិច្ចការពារសិទ្ធិការងារក្នុងសេដ្ឋកិច្ចក្រៅប្រព័ន្ធ និងការបង្កើតការងារប្រកបដោយប្រសិទ្ធភាពខ្ពស់៕
#MLVT #HENGSour |
ក្រសួងការងារ និងបណ្តុះបណ្តាលវិជ្ជាជីវៈ ជំរុញដល់បងប្អូនសេដ្ឋកិច្ចក្រៅប្រព័ន្ធ ទទួលការបណ្តុះបណ្តាលជំនាញវិជ្ជាជីវ: និងបច្ចេកទេស
