English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ នាព្រឹកថ្ងៃទី២៧ ខែតុលា ឆ្នាំ២០២៦ នៅទីស្តីការក្រសួង លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជាសហអធិបតីជាមួយលោក Reto Grüninger នាយកផ្នែកសហប្រតិបត្តិការនៃទីភ្នាក់ងារស្វ៊ីសសម្រាប់ការអភិវឌ្ឍ និងសហប្រតិបត្តិការ (SDC) ក្នុងពិធីបើក "វគ្គបណ្តុះបណ្តាលគ្រូបង្គោល TVET ស្តីពីការអនុវត្តអនាម័យល្អ និងសុវត្ថិភាពចំណីអាហារ" ក្រោមកម្មវិធី "មុខរបរនិងការងារសមរម្យសម្រាប់យុវជននៅកម្ពុជា" ដំណាក់កាលទី៣ (DEY III)។ ពិធីនេះមានការចូលរួមពីលោក សុខ ណារិន តំណាងអង្គការអភិវឌ្ឍន៍ឧស្សាហកម្មនៃអង្គការសហប្រជាជាតិ (UNIDO) ព្រមទាំងតំណាងស្ថាប័នពាក់ព័ន្ធ ដៃគូអភិវឌ្ឍន៍ គ្រូបង្គោល និងសិក្ខាកាមជាច្រើនរូប។
ថ្លែងក្នុងពិធីដ៏មានសារៈសំខាន់នេះ លោកជំទាវរដ្ឋលេខាធិការប្រចាំការ មានប្រសាសន៍ថា វគ្គបណ្តុះបណ្តាលរយៈពេល២ថ្ងៃនេះ មានគោលបំណងពង្រឹងចំណេះដឹង និងជំនាញរបស់គ្រូបង្គោល និងគ្រូបង្រៀនផ្នែកអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) លើការអនុវត្តអនាម័យល្អ និងសុវត្ថិភាពចំណីអាហារ ដើម្បីលើកកម្ពស់គុណភាពនៃការបណ្តុះបណ្តាល និងឆ្លើយតបនឹងតម្រូវការរបស់វិស័យឧស្សាហកម្ម។ លោកជំទាវបានគូសបញ្ជាក់ពីសារៈសំខាន់នៃការពង្រឹងកិច្ចសហការរវាងគ្រឹះស្ថាន TVET និងសហគ្រាស ដើម្បីធានាថា ការបណ្តុះបណ្តាលផ្តល់នូវចំណេះដឹង និងជំនាញជាក់ស្តែងស្របតាមតម្រូវការទីផ្សារការងារ។
លោកជំទាវបានបញ្ជាក់ថា ការអនុវត្តអនាម័យល្អ និងសុវត្ថិភាពចំណីអាហារ មិនត្រឹមតែជួយការពារអ្នកប្រើប្រាស់ និងធានាគុណភាពផលិតផលប៉ុណ្ណោះទេ ប៉ុន្តែថែមទាំងជួយកាត់បន្ថយហានិភ័យ បង្កើនផលិតភាព និងពង្រឹងសមត្ថភាពប្រកួតប្រជែងរបស់សហគ្រាស ជាពិសេសសហគ្រាសធុនតូច និងមធ្យម។ ការពង្រឹងជំនាញក្នុងវិស័យនេះ គឺជាផ្នែកសំខាន់នៃការអភិវឌ្ឍកម្លាំងពលកម្មដែលមានជំនាញ និងផលិតភាព ព្រមទាំងរួមចំណែកបង្កើនឱកាសការងារសមរម្យសម្រាប់យុវជនកម្ពុជា។
ជាមួយគ្នានេះ លោកជំទាវបានណែនាំឱ្យគ្រូបង្គោល និងសិក្ខាកាមទាំងអស់ចូលរួមយ៉ាងសកម្មក្នុងការសិក្សា ពិភាក្សា និងចែករំលែកបទពិសោធ ព្រមទាំងចំណេះដឹងពីការអនុវត្តជាក់ស្តែងនៅតាមគ្រឹះស្ថាន និងកន្លែងធ្វើការរៀងៗខ្លួន ដើម្បីទទួលបានអត្ថប្រយោជន៍ជាអតិបរមាពីវគ្គបណ្តុះបណ្តាលនេះ។ លោកជំទាវក៏បានជំរុញឱ្យសិក្ខាកាមយកចំណេះដឹង និងជំនាញដែលទទួលបានទៅអនុវត្តក្នុងការបំពេញការងារ និងបន្តចែករំលែកដល់សហការី សិស្ស និស្សិត និងអ្នកពាក់ព័ន្ធ ដើម្បីរួមចំណែកលើកកម្ពស់គុណភាពនៃការបណ្តុះបណ្តាល TVET នៅកម្ពុជា។
ក្នុងឱកាសនេះ លោក Reto Grüninger តំណាង SDC និងលោក សុខ ណារិន តំណាង UNIDO បានគូសបញ្ជាក់ពីសារៈសំខាន់នៃកិច្ចសហប្រតិបត្តិការក្នុងការអភិវឌ្ឍជំនាញវិជ្ជាជីវៈ និងលើកកម្ពស់ការអនុវត្តអនាម័យល្អ និងសុវត្ថិភាពចំណីអាហារ ដើម្បីឆ្លើយតបនឹងតម្រូវការរបស់វិស័យឧស្សាហកម្ម និងទីផ្សារការងារ។ តំណាងទាំងពីរក៏បានបង្ហាញពីការបន្តគាំទ្រដល់ការអនុវត្តកម្មវិធី DEY III ជាពិសេសការពង្រឹងសមត្ថភាពគ្រូបង្គោល TVET ការលើកកម្ពស់គុណភាពនៃការបណ្តុះបណ្តាល និងការអភិវឌ្ឍកម្លាំងពលកម្មដែលមានជំនាញ និងសមត្ថភាពប្រកួតប្រជែង ព្រមទាំងរួមចំណែកបង្កើនឱកាសការងារសមរម្យសម្រាប់យុវជនកម្ពុជា៕
#MLVT #HENGSour
