English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ ក្រសួងការងារ និងបណ្តុះបណ្តាលវិជ្ជាជីវៈ អង្គការថែទាំសុខភាពគ្រួសារកម្ពុជា (រ៉ាក់) និង UNFPA បានរួមគ្នារៀបចំ សិក្ខាសាលាតម្រង់ទិសស្តីពីភាពជាដៃគូ ក្នុងការលើកកម្ពស់ការទទួលបានសេវាសុខភាពផ្លូវភេទ និងសុខភាពបន្តពូជ ក្នុងចំណោម កម្មករ កម្មការិនី រោងចក្រកាត់ដេរ ក្រោមអធិបតីភាពរបស់ ឯកឧត្តមវេជ្ជបណ្ឌិត ហ៊ុយ ហានសុង រដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការសម្របសម្រួលត្រីភាគីប្រយុទ្ធនឹងជំងឺអេដស៍ និងគ្រឿងញៀននៅកន្លែងធ្វើការ នៅសណ្ឋាគារភ្នំពេញ នាព្រឹកថ្ងៃទី២២ ខែមីនា ឆ្នាំ២០២៣។ ដោយមានការឧបត្ថម្ភថវិកាពីមូលនិធិប្រជាជនជប៉ុន JTF តាមរយៈ IPPF។
ឯកឧត្តមវេជ្ជបណ្ឌិត ហ៊ុយ ហានសុង បានធ្វើការវាយតម្លៃខ្ពស់ចំពោះ អង្គការថែទាំសុខភាពគ្រួសារកម្ពុជា (រ៉ាក់) និង UNFPA ដែលបានចូលរួមយ៉ាងសកម្ម ប្រកបដោយស្មារតីសហការ និងការទទួលខុសត្រូវខ្ពស់រៀបចំសិក្ខាសាលាដ៏មានសារៈសំខាន់នេះឡើង។ ក្នុងនោះដែរ ឯកឧត្តមក៏បានលើកអំពី ការយកចិត្តទុកដាក់ចូលរួមអនុវត្តកម្មវិធីលើកកម្ពស់លក្ខខណ្ឌសុខភាពការងារនៅកន្លែងធ្វើការ ស្របតាមគោលនយោបាយរបស់រាជរដ្ឋាភិបាលកម្ពុជា ក៏ដូចជា ផែនការយុទ្ធសាស្ត្រអភិវឌ្ឍវិស័យការងារ និងបណ្តុះបណ្តាលបច្ចេកទេសវិជ្ជាជីវៈ ពីសំណាក់ អង្គការដៃគូជាតិ អន្តរជាតិ និងភាគីពាក់ព័ន្ធទាំងអស់កន្លងមក ជាពិសេស អង្គការថែទាំសុខភាពគ្រួសារកម្ពុជា (រ៉ាក់)។
ឯកឧត្តមរដ្ឋលេខា បានគូសបញ្ជាក់ថា ការផ្តល់សេវាសុខភាពការងារ ជាផ្នែកមួយដ៏សំខាន់ក្នុងការបង្ការ និងទប់ស្កាត់ហានិភ័យទាំងឡាយដែលកើតមានក្នុងអំឡុងពេលការងារ ដែលមានដូចជាគ្រោះថ្នាក់ការងារ និងជំងឺវិជ្ជាជីវៈនៅកន្លែងធ្វើការ ទាមទារចាំបាច់ឱ្យមាននីតិវិធី ឬគោលការណ៍ណែនាំច្បាស់លាស់ក្នុងការអនុវត្ត និងពិនិត្យតាមដានជំងឺវិជ្ជាជីវៈ សំដៅរៀបចំប្រព័ន្ធ ធានារ៉ាប់រងហានិភ័យការងារប្រកបដោយគុណភាព។
ក្នុងនាមក្រសួងការងារ និងបណ្តុះបណ្តាលវិជ្ជាជីវៈ ឯកឧត្តមវេជ្ជបណ្ឌិត ហ៊ុយ ហានសុង បានស្នើភាគីនិយោជក បង្កើនការអនុវត្តតាមគោលការណ៍ណែនាំស្តីពីការរៀបចំគិលានដ្ឋានឱ្យមានប្រសិទ្ធភាពខ្ពស់ ដោយរៀបចំឱ្យមានសេវាដែលជាសេចក្តីត្រូវការរបស់កម្មករនិយោជិត នៅក្នុងគិលានដ្ឋានសហគ្រាស គ្រឹះស្ថានរបស់ខ្លួន ដើម្បីឆ្ពោះទៅរកការធានាបាននូវសុខភាព និងសុខុមាលភាពនៅកន្លែងធ្វើការ។
លោកស្រីបណ្ឌិត សាផន សុមោលីរស្មី ជានាយិការងប្រតិបត្តិនៃ អង្គការថែទាំសុខភាពគ្រួសារកម្ពុជា (រ៉ាក់) បានឱ្យដឹងថារ៉ាក់គឺជាអង្គការមិនមែនរដ្ឋាភិបាលដែលធ្វើការលើកកម្ពស់សុខភាពផ្លូវភេទសុខភាពបន្តពូជ និងសិទ្ធិនៅក្នុងប្រទេសកម្ពុជាចាប់តាំងពីឆ្នាំ១៩៩៦មកម្ល៉េះ។ អង្គការរ៉ាក់ មានឆន្ទៈក្នុងការ គាំទ្រប្រជាជនគ្រប់រូបនៅកម្ពុជាមានសិទ្ធិពេញលេញទាក់ទងនឹងរឿងផ្លូវភេទ និងទទួលបានសុខភាពផ្លូវភេទ និងសុខភាពបន្តពូជ។
លោកស្រី បានបញ្ជាក់ពីបញ្ហាប្រឈមមួយចំនួនដែលរារាំងការទទួលបានព័ត៌មាន និងសេវាសុខភាពផ្លូវភេទ សុខភាពបន្តពូជ ដែលមានដូចជាបរិបទនៃការប្រែប្រួលអាកាសធាតុ ការទទួលរងផលប៉ះពាល់ពីការរាតត្បាតជំងឺកូវីដ និងក្រោយការរាតត្បាត ជំនឿ និងបទដ្ឋានអវិជ្ជមានសង្គមមួយចំនួន ជាដើម។
ប៉ុន្តែទោះជាយ៉ាងណាក៏ដោយ ការលើកកម្ពស់សុខភាពនៅតែបន្តយ៉ាងសកម្ម ក្រោមបរិយាកាសអំណោយផលនៃគោលនយោបាយ និន្នាការ និងការគ្រប់គ្រងប្រកបដោយព្រហ្មវិហារធម៌នៃរាជរដ្ឋាភិបាលកម្ពុជា តាមរយៈកិច្ចសហការយ៉ាងជិតស្និតពីភាគីពាក់ព័ន្ធជំរុញដល់ប្រទេសកម្ពុជាអាចសម្រេចទៅបានតាមការប្តេជ្ញាចិត្តឆ្លើយតបគោលដៅអភិវឌ្ឍប្រកបដោយចីរភាព ឆ្នាំ២០៣០ និងសន្និសិទ្នអន្តរជាតិស្តីពីប្រជាជន និងការអភិវឌ្ឍ ICPD លើកទី ២៥៕
