ភាសាខ្មែរ 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
(ភ្នំពេញ)៖ បន្ទាប់ពីអញ្ជើញទៅបំពេញទស្សនកិច្ច នៅប្រទេសជប៉ុនរយៈពេល០៤ថ្ងៃកន្លងមកនេះ ប្រកបដោយជោគជ័យ និងទទួលបាននូវលទ្ធផលគួរជាទីមោទនៈនោះ គណៈប្រតិភូកម្ពុជាដឹកនាំដោយឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមកដល់មាតុប្រទេសវិញដោយសុវត្ថិភាព នារសៀលថ្ងៃទី២៦ ខែមីនា ឆ្នាំ២០១៩នេះ។ គួរបញ្ជាក់ផងដែរថា នៅក្នុងដំណើរបំពេញទស្សនកិច្ចការងារនៅប្រទេសជប៉ុនក្នុងរយៈពេល០៤ថ្ងៃកន្លងមកនេះ ក្នុងនោះគណៈប្រតិភូជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈកម្ពុជា បានអញ្ជើញជួបពិភាក្សាការងារជាមួយអង្គការ JITCO ដោយពិភាក្សាលើកិច្ចសហប្រតិបត្តិការនាពេលកន្លងមក ទាក់ទងកម្មសិក្សាការីខ្មែរដែលកំពុងធ្វើកម្មសិក្សា និងធ្វើការនៅប្រទេសជប៉ុន និងទាក់ទងទៅនឹងច្បាប់ស្តីពី "ពលករជំនាញ" ដែលទៅធ្វើការនៅប្រទេសជប៉ុន តាមរយៈការផ្សព្វផ្សាយអំពីច្បាប់ និងនីតិវិធីដល់ភ្នាក់ងារ ទាំងនៅជប៉ុន និងកម្ពុជា។
ទន្ទឹមនឹងនេះ ភាគីទាំងពីរក៏បានឯកភាពគ្នារៀបចំកិច្ចព្រមព្រៀងសហប្រតិបត្តិការថ្មីស្របតាមច្បាប់ថ្មីនេះ ដើម្បីធ្វើយ៉ាងណាឱ្យការគ្រប់គ្រង និងការការពារផលប្រយោជន៍ពលករកម្ពុជា ស្របតាមច្បាប់នៃប្រទេសទាំងពីរ។ តមក គណៈប្រតិភូ បានអញ្ជើញជួបពិភាក្សាការងារជាមួយ អង្គការសម្រាប់កម្មវិធីបណ្តុះបណ្តាលបច្ចេកទេស ហៅកាត់ថា (OTIT) ។ នាឱកាសនោះ លោក SUZUKI ប្រធានអង្គការ បានជម្រាបជូនថា អង្គការនេះមានសាខាជាច្រើននៅទូទាំងប្រទេសជប៉ុន ដើម្បីផ្តល់សេវាគាំពារ ប្រឹក្សាយោបល់ និងជួយគាំទ្រដល់កម្មសិក្សាការីខ្មែរ ដែលកំពុងធ្វើកម្មសិក្សា និងធ្វើការនៅប្រទេសជប៉ុន និងរៀបចំបែបបទថ្មីសម្រាប់ការទទួលកម្មសិក្សាការីពីប្រទេសផ្សេងៗ ស្របតាមច្បាប់ និងបានជម្រាបជូនអំពីវឌ្ឍនភាពនៃកិច្ចសហការកន្លងមកទទួលបានភាពល្អប្រសើរ ព្រមទាំងស្នើសុំឱ្យមានការសហការគ្នាបន្តទៀត ដើម្បីធ្វើយ៉ាងណាផ្តល់នូវការគាំពារទាំងឡាយស្របតាមច្បាប់ ជាពិសេសការផ្តល់ជំនាញពិតប្រាកដ ដើម្បីពួកគេអាចប្រកបមុខរបរបានទាំងនៅជប៉ុន និងនៅកម្ពុជា។ ឯកឧត្តមរដ្ឋមន្រ្តី បានសម្តែងនូវការអរគុណចំពោះការស្វាគមន៍គណៈប្រតិភូ និងកោតសរសើរចំពោះកិច្ចសហការកន្លងមក ដែលទទួលបានលទ្ធផលល្អជាបន្តបន្ទាប់ និងបានស្នើសុំឱ្យមានការបន្តពង្រឹងកិច្ចសហការល្អរវាងប្រទេសទាំងពីរ និងគាំទ្រដល់ការបណ្តុះបណ្តាល និងជ្រើសរើសកម្មសិក្សាការីខ្មែរមកជប៉ុនបានកាន់តែច្រើនថែមទៀត ព្រមទាំងជួយក្រសួងក្នុងការរៀបចំបែបបទផ្សេងៗស្របតាមនីតិវិធីនៃច្បាប់ថ្មី និងផ្តល់ជំនួយបច្ចកទេសលើការបណ្តុះបណ្តាលជំនាញបច្ចេកទេសដល់កម្មសិក្សាការីខ្មែរឱ្យស្របតាមតម្រូវការទីផ្សារការងារនៅប្រទេសជប៉ុន ព្រមជាមួយនោះសូមជួយផ្សព្វផ្សាយ និងណែនាំដល់សមាគមនាំពលករពីកម្ពុជាបានដឹងពីនីតិវិធីថ្មីៗ ស្របតាមច្បាប់របស់ប្រទេសជប៉ុន និងសូមអញ្ជើញទៅទស្សនកិច្ចនៅកម្ពុជា នាពេលខាងមុខដើម្បីមានឱកាសពិភាក្សាការងារទាំងនេះឱ្យបានកាន់តែល្អប្រសើរថែមទៀត។
កម្មវិធីដ៏មានអត្ថន័យធំធេងនៃដំណើរទស្សនកិច្ចរបស់គណប្រតិភូនាពេលនោះគឺ ពិធីចុះអនុស្សរណៈនៃកិច្ចសហប្រតិបត្តិការស្តីពីការបញ្ជូនពលករជំនាញ។ ពិធីចុះហត្ថលេខានេះ ធ្វើឡើងរវាងឯកឧត្តម សេង សក្តា ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានការងារ និងលោកជំទាវ Shoko SASAKI អគ្គនាយកអន្តោប្រវេសន៍ជប៉ុន។ ក្រោមអធិបតីភាពឯកឧត្តមបណ្ឌិត អុិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម Takashi YAMASHITA រដ្ឋមន្ត្រីក្រសួងយុត្តិធម៌ នៃប្រទេសជប៉ុន។ នៅក្នុងពិធីដ៏វិសេសវិសាលនោះ ឯកឧត្តម Takashi YAMASHITA រដ្ឋមន្ត្រីក្រសួងយុត្តិធម៌ នៃប្រទេសជប៉ុន បានរលឹកឡើងថា កាលពីឆ្នាំកន្លងទៅ កម្ពុជា-ជប៉ុន បានប្រារព្ធពិធីអបអរសាទរខួបលើកទី៦៥នៃទំនាក់ទំនងការទូតកម្ពុជា-ជប៉ុន ហើយការចុះអនុស្សារណៈនៃកិច្ចសហប្រតិបត្តិការស្តីពីពលករជំនាញនាថ្ងៃនេះ ជាភស្តុតាងបញ្ជាក់យ៉ាងច្បាស់ ពីទំនាក់ទំនងដ៏ស្អិតរមួត រវាងប្រទេសទាំងពីរឱ្យកាន់តែរឹងមាំថែមទៀត ។ ជាមួយនឹងភាពរីករាយនេះ ឯកឧត្តមបណ្ឌិត អុិត សំហេង បានសម្តែងនូវការកោតសរសើរ ចំពោះក្រុមការងារបច្ចេកទេសនៃប្រទេសទាំងពីរ កម្ពុជា-ជប៉ុន ដែលបានខិតខំសហការគ្នា ប្រកបដោយការទទួលខុសត្រូវខ្ពស់ នាពេលកន្លងមករហូតឈានដល់ការចុះអនុស្សរណៈនៃការយោគយល់គ្នានេះ។ ឯកឧត្តមរដ្ឋមន្ត្រី អុិត សំហេង មានប្រសាសន៍លើកឡើងថា តាមរយៈអនុស្សារណៈនៃកិច្ចសហប្រតិបត្តិការនេះ ឯកឧត្តមមានជំនឿយ៉ាងមុតមាំថា ពលករជំនាញកម្ពុជានឹងមានលទ្ធភាពគ្រប់គ្រាន់ក្នុងការចាប់យកឱកាសមាសនេះ ដើម្បីជាផលប្រយោជន៍សម្រាប់ខ្លួនឯងផង សម្រាប់កម្ពុជាផង ក៏ដូចជាចូលរួមចំណែកដោះស្រាយបញ្ហាកង្វះកម្លាំងពលកម្មរបស់ជប៉ុន ជាពិសេសសម្រេចឱ្យបាននូវចក្ខុវិស័យគ្រប់ជ្រុងជ្រោយជាយុទ្ធសាស្រ្តនៃប្រទេសទាំងពីរផងដែរ៕
