English 
ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ
ស្អែកនេះ ពិព័រណ៍ការងារ នឹងត្រូវរៀបចំឡើងរយៈពេលពីរថ្ងៃជាប់គ្នា គឺថ្ងៃទី២៣-២៤ ខែមិថុនា ឆ្នាំ២០២២ ចាប់ពីម៉ោង ៨ ព្រឹក ដល់ម៉ោង ១៧:០០នាទីល្ងាច នៅទីតាំងអាគារ KAMPUS ដែលមានអាសយដ្ឋាន ៥០២ មហាវិថីព្រះមុនីវង្ស ជិតស្ពានអាកាសក្បាលថ្នល់ ដោយនាំមកនូវ ឱកាសការងារប្រមាណ ៣២០០ កន្លែងពីក្រុមហ៊ុនធំៗជាង២០ ដើម្បី ផ្តល់ជូនយុវជន សិស្ស/និស្សិត និងអ្នកស្វែងរកការងារធ្វើ។ ពិព័រណ៍ ការងារនេះ ត្រូវបានរៀបចំឡើងដោយ ទីភ្នាក់ងារជាតិមុខរបរ និង ការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ដោយ សហការជាមួយសហភាពសហព័ន្ធយុវជនកម្ពុជា រាជធានីភ្នំពេញ និងទទួលបានការគាំទ្រពីអង្គការអន្តរជាតិខាងការងារ (ILO)។
ក្រៅពីទទួលបានឱកាសការងារជាច្រើនក្នុងមុខជំនាញផ្សេងៗគ្នា យុវជន សិស្ស/និស្សិត និងអ្នកស្វែងរកការងារ ក៏អាចចូលរួមដោយ មិនគិតថ្លៃនៅក្នុងវេទិកា ចែករំលែកចំណេះដឹង និងបទពិសោធន៍ស្តីពី៖ «ការត្រៀមខ្លួនចូលការងារ និងសហគ្រិនភាព» ដើម្បីនឹងទទួល បាន ចំណេះដឹងពីវាគ្មិនល្អៗដែលមានបទពិសោជន៍ក្នុងទីផ្សារការងារផងដែរ។
ពិព័រណ៍ការងារប្រចាំឆមាស ជាការព្រឹត្តិការណ៍ដ៏មានសារសំខាន់ ក្នុងការជ្រើសរើសបុគ្គលិក និងស្វែងរកការងារតាមរយៈការប្រមូលផ្តុំ និងផ្សព្វផ្សាយឱកាសការងារពីសំណាក់និយោជក ក្រុមហ៊ុនឯកជន ដើម្បីជួបផ្ទាល់ជាមួយយុវជន សិស្ស/និស្សិត និងអ្នកស្វែងរកការងារ ដើម្បីដាក់ពាក្យស្នើសុំការងារ និងជួបសម្ភាសផ្ទាល់តែម្តង។ ចំណែកអ្នកចូលរួម នឹងទទួលបានការប្រឹក្សាយោបល់អាជីព និងការងារដើម្បីត្រៀមលក្ខណៈសម្បត្តិចូលទីផ្សារការងារឲ្យបានល្អ។
ដូច្នេះ យុវជន សិស្ស/និស្សិត និងអ្នកស្វែងរកការងារធ្វើ កុំភ្លេចត្រៀមប្រវត្តិរូបសង្ខេប (CV) ដើម្បីដាក់ពាក្យ និងសម្ភាសភ្លាមៗជាមួយតំណាងក្រុមហ៊ុនធំៗដែលចូលរួមតាំងបង្ហាញនៅក្នុងពិព័រណ៍នេះ។ សម្រាប់ព័ត៌មានបន្ថែម សូមទាក់ទងមកទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕