(ខេត្តថៃង្វៀន-វៀតណាម)៖ បន្ទាប់ពីបានជួបសំណេះសំណាលជាមួយតំណាងក្រសួងការងារ ជនពិការ និងសង្គមកិច្ចវៀតណាម តំណាងខេត្តថៃង្វៀន និងថ្នាក់ដឹកនាំ សាស្រ្តាចារ្យ លោកគ្រូ អ្នកគ្រូ បុគ្គលិកសិក្សាសាលាថៃង្វៀនរួចមក ឯកឧត្តមបណ្ឌិត អុិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំគណៈប្រតិភូ ជួបសំណេះសំណាល សួរសុខទុក្ខដោយផ្ទាល់ជាមួយនិស្សិតកម្ពុជា ចំនួន១០៨នាក់ ដែលកំពុងសិក្សានៅសាលាថៃង្វៀន ដោយទទួលបានអាហារូបករណ៍ពីរដ្ឋាភិបាល នៃសាធារណរដ្ឋសង្គមនិយមវៀតណាម។
នាឱកាសនោះ ឯកឧត្តមបណ្ឌិត អុិត សំហេង បានសំដែងនូវការនឹករលឹក និងការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ចំពោះការគិតគូដល់អនាគតក្មួយៗដែលជានិស្សិតកម្ពុជា ក្នុងការបណ្តុះបណ្តាល កសាងសមត្ថភាពរបស់ពួកគេសម្រាប់ចូលរួមអភិវឌ្ឍន៍ប្រទេសជាតិឱ្យកាន់តែរីកចម្រើនថែមទៀត។ រាជរដ្ឋាភិបាលកម្ពុជាបាននឹងកំពុងខិតខំផ្តល់ឱកាសដល់យុវជន ឱ្យទទួលបាននូវឱកាសសិក្សាសម្រាប់អនាគតរបស់ពួកគេ ទាំងក្នុងនិងក្រៅប្រទេស។ ជាក់ស្តែង ឱកាសដែលនិស្សិតកម្ពុជា បានមកសិក្សានៅសាលាថៃង្វៀននេះ បើគ្មានកិច្ចសហប្រតិបត្តិការល្អរវាងរដ្ឋាភិបាលនៃប្រទេសទាំងពីរទេ គឺមិនមានឱកាសបែបនេះទេ។
ឯកឧត្តមរដ្ឋមន្រ្តី បានថ្លែងនូវការអគុណចំពោះក្រសួងការងារ ជនពិការ និងសង្គមកិច្ចវៀតណាម រដ្ឋបាលខេត្តថៃង្វៀន និងសាលាថៃង្វៀន ដែលបានផ្តល់នូវឱកាសដល់និស្សិតកម្ពុជា ក៏ដូចជាផ្តល់នូវការគំាពារយកចិត្តទុកដាក់ដល់ពួកគេក្នុងអំឡុងពេលស្នាក់នៅសិក្សារៀនសូត្រនៅទីនេះ។
ការអភិវឌ្ឍធនធានមនុស្សបានក្លាយជាអាទិភាពទី១ សម្រាប់គោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា។ គោលនយោបាយជាច្រើនបាននឹងកំពុងអនុវត្តដើម្បីជំរុញកសាងធនធានមនុស្សគ្រប់ប្រភេទ ជាពិសេស ធនធានមនុស្សផ្នែកវិជ្ជាជីវ: ដើម្បីឆ្លើយតបទៅនឹងកំណើនរីកចម្រើនយ៉ាងឆាប់រហ័សនៃសេដ្ឋកិច្ច សង្គម កម្ពុជានាពេលបច្ចុប្បន្ន។
ទន្ទឹមគ្នានេះដែរ ឯកឧត្តមរដ្ឋមន្ត្រី ក៏បានផ្តាំផ្ញើដល់និស្សិតទាំងអស់ឱ្យចេះស្រឡាញ់គ្នាជួយថែរក្សាគ្នា គោរពឱ្យបានតាមបទបញ្ជផ្ទៃក្នុង វិន័យ ក៏ដូចជាច្បាប់ទម្លាប់នៅប្រទេសវៀតណាម ហើយខិតខំប្រឹងប្រែងសិក្សារៀនសូត្រ ឱ្យក្លាយជាធនធានមនុស្សដ៏ពូកែរបស់កម្ពុជា ក្នុងការចូលរួមអភិវឌ្ឍសេដ្ឋកិច្ច សង្គមជាតិរបស់ខ្លួន។
និស្សិតកម្ពុជាបានសំដែងនូវសេចក្តីរីករាយ និងបានថ្លែងអំណរគុណយ៉ាងជ្រាលជ្រៅចំពោះឯកឧត្តមរដ្ឋមន្រ្តី និងគណៈប្រតិភូ ក៏ដូចជារាជរដ្ឋាភិបាលកម្ពុជា ដែលបានយកចិត្តទុកដាក់ផ្តល់ឱកាស ដល់ពួកគាត់អាចបានមកសិក្សារៀនសូត្រ មានចំណេះដឹងសម្រាប់អនាគតភ្លឺស្វាងរបស់ពួកគេ។
គួរបញ្ជាក់ថា និស្សិតទាំង១០៨នាក់នេះ បានទទួលអាហារូបករណ៍ពីរដ្ឋាភិបាលនៃសាធារណរដ្ឋសង្គមនិយមវៀតណាម តាមរយៈក្រសួងការងារ និងបណ្តុះបណ្តាលវិជ្ជាជីវៈ នៃព្រះរាជាណាចក្រកម្ពុជា បច្ចុប្បន្នកំពុងសិក្សាកម្រិតសញ្ញាបត្រជាន់ខ្ពស់បច្ចេកទេស ឬបរិញ្ញាបត្ររង រយៈពេល ៤ឆ្នាំ (សិក្សាភាសារយៈពេល ១ឆ្នាំ និងជំនាញរយៈពេល ៣ឆ្នាំ) លើមុខជំនាញ៖ បច្ចេកទេស និងវិជ្ជាជីវៈ ដូចជា៖ ទំនាក់ទំនង និងបច្ចេកទេសអេឡិចត្រូនិក, ប្រៃសណីយ៍ និងទូរគមនាគមន៍, វិស្វកម្មអេឡិចត្រូនិក និងទំនាក់ទំនង, អគ្គិសនីឧស្សាហកម្ម, គ្រប់គ្រងពាណិជ្ជកម្ម, សេវាកម្មច្បាប់, គណនេយ្យអាជីវកម្ម, សវនកម្មគណនេយ្យ, ធនាគារ និងហិរញ្ញវត្ថុ និងព័ត៌មានវិទ្យា៕