(ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្តុះបណ្តាលវិជ្ជាជីវៈស្នើឱ្យនិស្សិតកម្ពុជាដែលជាប់អាហារូបករណ៍អឺរ៉ាស្មូសផ្លឹស(ERASMUS+) សិក្សានៅសាធារណរដ្ឋបារាំង ខិតខំសិក្សារៀនសូត្រក្រេបចំណេះដឹងដើម្បីត្រលប់មកជួយសង្គមជាតិវិញ បន្ទាប់ពីបញ្ចប់ការសិក្សា ដោយលោកជំទាវសង្ឃឹមយ៉ាងមុតមាំថា និស្សិតកម្ពុជាទាំងនេះនឹងក្លាយជាធនធានមនុស្សដ៏មានសក្តានុពលសម្រាប់កម្ពុជានាពេលអនាគតខាងមុខ។ 

លោកជំទាវរដ្ឋលេខាធិការប្រចាំការមានប្រសាសន៍បែបនេះនៅក្នុងកម្មវិធីសំណេះសំណាលជាមួយនិស្សិតអាហារូបករណ៍អឺរ៉ាស្មូសផ្លឹស នារសៀលថ្ងៃទី១៣ ខែមករា ឆ្នាំ២០២៥ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ។ កម្មវិធីសំណេះសំណាលនេះដែរក៏មានការចូលរួមពីសំណាក់មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈដែលជាអតីតនិស្សិតធ្លាប់សិក្សានៅសាធារណរដ្ឋបារាំងផងដែរ។

នៅក្នុងពិធីសំណេះសំណាលនេះដែរ លោកជំទាវ សុវណ្ណ វណ្ណារតន៍ បានគូសបញ្ជាក់បន្ថែមថា អាហារូបករណ៍អឺរ៉ាស្មូសផ្លឹស(ERASMUS+) គឺជាលទ្ធផលផ្លែផ្កានៃទំនាក់ទំនងល្អលើកិច្ចសហប្រតិបត្តិការរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋបារាំង។ លោកជំទាវ បានកត់សម្គាល់ថា នៅឆ្នាំនេះកម្មវិធីអាហារូបករណ៍អឺរ៉ាស្មូសផ្លឹស(ERASMUS+) ក៏មាននិស្សិតកម្ពុជាជាស្រ្តីអាចបន្តជាប់អាហារូបករណ៍របស់រដ្ឋាភិបាលបារាំងមួយ។ ក្នុងន័យនេះលោកជំទាវរដ្ឋលេខាធិការប្រចាំការមើលឃើញថា កម្មវិធីអាហារូបករណ៍នេះមិនត្រឹមតែបង្ហាញពីចក្ខុវិស័យលើការអភិវឌ្ឍធនធានមនុស្សសម្រាប់កម្ពុជានោះទេ ក៏ប៉ុន្តែក៏បង្ហាញពីសមភាពយេនឌ័រនៅក្នុងវិស័យអប់រំកម្ពុជា ជាពិសេសលើថ្នាលបច្ចេកវិទ្យា និងជំនាញបច្ចេកទេស។ 

ទន្ទឹមនេះ លោកជំទាវសង្ឃឹមយ៉ាងមុតមាំថា និស្សិតកម្ពុជាដែលនឹងទៅបន្តការសិក្សានៅសាធារណរដ្ឋបារាំងទាំងអស់នឹងចេះស្រលាញ់គ្នា ចេះជួយគ្នាទៅវិញមក ហើយនឹងខិតខំសិក្សារៀនសូត្រពង្រឹងសមត្ថភាពឱ្យបានខ្ពស់ ដើម្បីត្រលប់មកកាន់មាតុភូមិវិញប្រកបដោយលទ្ធផលផ្លែផ្កាសម្រាប់ជាធនធានមនុស្សកម្ពុជាដ៏មានសក្តានុពល៕

#MLVT #HENGSour