ឯកឧត្តម​បណ្ឌិត​រដ្ឋមន្រ្តី បាន​អនុញ្ញាត​ឱ្យ​លោក​បណ្ឌិត Frank Hoffer នាយកប្រតិបត្តិACT ចូល​ជួប​សំដែង​ការ​គួរ​សម និង​ពិភាក្សា​ការងារ

 អង្គារ, 14 វិច្ឆិកា 2017 14:43  |    Written by MLVT  |  67 times  |   Print  |   Email

នាព្រឹកថ្ងៃទី១៤ ខែវិច្ឆិកា ឆ្នាំ២០១៧ នៅទីស្តីការក្រសួងការងារ និងបណ្តុះបណ្តាលវិជ្ជាជីវៈ ឯកឧត្តមបណ្ឌិតរដ្ឋមន្រ្តី អ៊ិត សំហេង បានអនុញ្ញាតឱ្យលោកបណ្ឌិត Frank Hoffer នាយកប្រតិបត្តិACT (Action Collaboration Transformation សកម្មភាព កិច្ចសហការ ការផ្លាស់ប្តូរ) ដឹកនាំគណៈប្រតិភូចូលជួបសំដែងការគួរសម និងពិភាក្សាការងារ។ លោកបណ្ឌិត Frank Hoffer បានសំដែងនូវក្តីពេញចិត្តយ៉ាងខ្លាំង ចំពោះអ្វីដែលរាជរដ្ឋាភិបាលកម្ពុជា បាននឹងកំពុងអនុវត្ត ព្រោះវាស្របទៅនឹងសកម្មភាពកន្លងមក ក៏ដូចផែនការទៅអនាគតដែល ACT គ្រោងនឹងបន្តការងាររបស់ខ្លួននៅកម្ពុជា។ ភាគីទាំងពីរបានផ្លាស់ប្តូរនូវព័ត៌មាន និងបទពិសោធន៍ ក៏ដូចជាវឌ្ឍនភាពដែលបានវិវត្តន៍រីកចំរើននៅក្នុងវិស័យវាយនភណ្ឌ កាត់ដេរសម្លៀកបំពាក់ និងផលិតស្បែកជើងនៅកម្ពុជា ដោយផ្តោតលើទស្សនរួមគ្នា ក្នុងការធានាឱ្យបាននូវនិរន្តរភាពឧស្សាហកម្មកាត់ដេរសម្លៀកបំពាក់នៅកម្ពុជា តាមរយៈការដាក់ចេញនូវយុទ្ធសាស្រ្តរៀងៗខ្លួន ដែលយុទ្ធសាស្រ្តទាំងនោះសុទ្ធតែមានគោលដៅរួមគ្នា គឹសំដៅធ្វើយ៉ាងណាឱ្យអ្នក បញ្ជាទិញយីហោល្បឺៗអន្តរជាតិនៅតែបន្តបង្កើនការបញ្ជាទិញសម្លៀកបំពាក់ពីកម្ពុជា អាស្រ័យដោយគោលនយោបាយ ក៏ដូចជាយុទ្ធសាស្រ្តរបស់រាជរដ្ឋាភិបាល កម្ពុជាដែលបាននឹងកំពុងអនុវត្ត បានឆ្លើយតបយ៉ាងមានប្រសិទ្ធភាពទៅនឹងការចង់បានរបស់ACT អ្នកបញ្ជាទិញអន្តរជាតិ និងសហជីពពិភពលោក (IndustriALL Global Union)។ ភាគីទាំងពីរបានឯកភាពគ្នាក្នុងការបង្កើនពង្រឹង ភាពជាដៃគូជាមួយភាគីពាក់ព័ន្ធទាំងអស់ ផ្អែកតាមមតិរបស់ឯកឧត្តមរដ្ឋមន្រ្តីដែលលើកឡើងថា ភាពជោគជ័យរបស់យើងអាចសម្រេចទៅបានលុះត្រាគ្រប់ភាគីពាក់ព័ន្ធចូលរួមយ៉ាងសកម្ម និងប្រកបដោយន័យស្ថាបនា ដោយយើងប្រើប្រាស់យន្តការត្រីភាគី បូក បូក (Tripartite Mechanism ++)។

ឯកឧត្តមរដ្ឋមន្រ្តីបានផ្តល់គាំទ្រ និងលើកទឹកចិត្តដល់គម្រោងរបស់ ACT ដែលគ្រោងនឹងបន្តកិច្ចសហប្រតិបត្តិការបស់ខ្លួននៅកម្ពុជា ក្នុងការបេ្តជ្ញាធានាថាការបញ្ជាទិញទំនិញពីកម្ពុជា ជួយសម្រួលដល់ការដោះស្រាយទូទាត់ប្រាក់ឈ្នួលសមរម្យ បង្កើតយន្តការនានា ភ្ជាប់ការអនុវត្តការបញ្ជាទិញទៅនឹងការចរចាអនុសញ្ញារួម ដើម្បីធ្វើអោយម្ចាស់សហគ្រាសអាចបំពេញបានតាមលក្ខខណ្ឌនានានៃកិច្ចសន្យាស្តីពីប្រាក់ឈ្នួល និងលក្ខខណ្ឌការងារដែលបានឯកភាព។ ទន្ទឹមនឹងនេះ ACT នឹងធ្វើការជាមួយសហគ្រាសនានាដើម្បីបង្កើត និងធ្វើអោយប្រសើរឡើងនូវស្តង់ដារ និងប្រព័ន្ធផលិតកម្ម ដូចជាប្រសិទ្ធភាពធនធានមនុស្ស និងប្រព័ន្ធគ្រប់គ្រងប្រាក់ឈ្នួល ជម្រុញឱ្យមានការរីកចម្រើនយ៉ាងឆាប់រហ័សក្នុងផ្នែកផលិតភាព និងទំនើបកម្មឧស្សាហកម្ម ដែលមានការទទួលស្គាល់ថាសុវត្ថិភាពអាជីវកម្ម និងការប្តេជ្ញាចិត្តរបស់ប្រទេសផលិត និងម្ចាស់សហគ្រាសនានា គឺជាកត្តាយ៉ាងសំខាន់សម្រាប់ការទូរទាត់ប្រាក់ឈ្នួលសមរម្យ។ សូមបញ្ជាក់ថា ACT គឺជាកិច្ចព្រមព្រៀងបង្កើតថ្មីមួយរវាងយីហោផលិតផលអន្តរជាតិ និងអាជីវករលក់រាយ និងសហជីពពាណិជ្ជកម្ម ដើម្បីផ្លាស់ប្តូរឧស្សាហកម្មកាត់ដេរ និងវាយនភ័ណ្ឌ និងដើម្បីសម្រេចបាននូវប្រាក់ឈ្នួលសមរម្យសម្រាប់ កម្មករកម្មការិនីតាមរយៈការចរចារអនុសញ្ញារួមក្នុងវិស័យឧស្សាហកម្មទំាងមូលភ្ជាប់ទៅនឹងការអនុវត្តការបញ្ជាទិញ។