ធ្វើបច្ចុប្បន្នភាពលេខទូរសព័្ទ និងលេខអត្តសញ្ញាណប័ណ្ណសញ្ជាតិខ្មែរ

ព័ត៌មានច្បាស់លាស់ ត្រឹមត្រូវអំពីវិស័យការងារ សន្តិសុខសង្គម

របៀប Upload បញ្ជីឈ្មោះបច្ចុប្បន្នភាពរបស់កម្មករនិយោជិត

ក្រសួងការងារ និងភាគីពាក់ព័ន្ធ រួមគ្នា បើកវគ្គបណ្តុះបណ្តាលគ្រូបង្គោលស្តីពីសិទ្ធិធ្វើកូដកម្ម និងធ្វើបាតុកម្មដោយសន្តិវិធី

 Tuesday, 01 October 2019 10:40  |    Written by MLVT  |  3110 times  |   Print  |   Email

(កណ្តាល)៖ វគ្គបណ្តុះបណ្តាលគ្រូបង្គោលស្តីពីសិទ្ធិធ្វើកូដកម្ម និងធ្វើបាតុកម្មដោយសន្តិវិធី” រៀបចំដោយក្រសួងការងារ និងបណ្តុះបណ្តាលវិជ្ជាជីវៈ និងចូលរួមសហការរៀបចំដោយក្រសួងមហាផ្ទៃ អគ្គស្នងការនគរបាលជាតិ បណ្ឌិត្យសភានគរបាលកម្ពុជា អង្គការអន្តរជាតិខាងការងារ (ILO) និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) រួមគ្នាបើកវគ្គបណ្តុះបណ្តាលនេះ នាព្រឹកថ្ងៃទី០១ ខែតុលា ឆ្នាំ២០១៩ នៅបណ្ឌិត្យសភានគរបាលកម្ពុជា។

វគ្គបណ្តុះបណ្តាលនេះ រៀបចំឡើងក្នុងគោលបំណង ១- បណ្តុះបណ្តាលគ្រូបង្គោលជាមន្ត្រីនគរបាលចំនួន១២០នាក់ អំពីសិទ្ធិធ្វើកូដកម្ម និងធ្វើបាតុកម្មដោយសន្តិវិធី ដើម្បីធានាការអនុវត្តសេរីភាពជា  មូលដ្ឋានរបស់ប្រជាពលរដ្ឋដែលកំណត់នៅក្នុងរដ្ឋធម្មនុញ្ញ, ២-បំពេញបន្ថែម ចំណេះដឹងអំពីសិទ្ធិក្នុងការប្រមូលផ្តុំរបស់កម្មករនិយោជិត ជាអាទិ៍ សិទ្ធិធ្វើកូដកម្ម និងធ្វើបាតុកម្មដោយសន្តិវិធី ដូចមានកំណត់ក្នុងបទប្បញ្ញត្តិច្បាប់ជាតិជាធរមាន ស្របតាមអនុសញ្ញាអន្តរជាតិដែលកម្ពុជាបានផ្តល់សច្ចាប័ន ជូនមន្រ្តីអនុវត្តច្បាប់ និង ៣-លើកកម្ពស់ប្រសិទ្ធភាពក្នុងការអនុវត្តច្បាប់របស់មន្ត្រីនគរបាល ដើម្បីធានាថា សេរីភាពអង្គការវិជ្ជាជីវៈ និងសេរីភាពក្នុងការបញ្ចេញមតិតាមរយៈការធ្វើបាតុកម្មដោយសន្តិវិធី ត្រូវបានអនុវត្តក្នុងបរិយាកាសដែលមិនមានការគំរាមកំហែង និងហិង្សា។ 

វគ្គបណ្តុះបណ្តាលនេះត្រូវបានបែងចែកជា ៤វគ្គ បន្តបន្ទាប់ ដែលក្នុងមួយវគ្គៗ មានរយៈពេល២ថ្ងៃ និងមានសិក្ខាកាមចូលរួមចំនួន៣០នាក់ដោយផ្តោតលើប្រធានបទ ១.ការដោះស្រាយវិវាទការងារ និងសិទ្ធិធ្វើកូដកម្ម ២.ការធ្វើបាតុកម្មដោយសន្តិវិធី

ឯកឧត្តម សោម ចំណាន អនុរដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពស់ខ្ពស់ឯកឧត្តមរដ្ឋមន្ត្រី អ៊ិត សំហេង ដែលអញ្ជើញជាអធិបតីនាឱកាសនោះ បានថ្លែងអំណរគុណ ចំពោះកិច្ចខិតខំប្រឹងប្រែងយកចិត្តទុកដាក់រៀបចំវគ្គបណ្តុះបណ្តាលដ៏មានសារៈសំខាន់នេះនិងសូមវាយតម្លៃចំពោះវត្តមានរបស់ ឯកឧត្តម លោក លោកស្រី ជាគ្រូឧទ្ទេស ដែលបានចំណាយពេលដ៏មានតម្លៃចូលរួមធ្វើបទឧទ្ទេសនាម និងចែករំលែកបទពិសោធន៍ល្អៗពាក់ព័ន្ធនឹងការអនុវត្តសិទ្ធិធ្វើកូដកម្ម និងធ្វើបាតុកម្មដោយសន្តិវិធី សំដៅធានាបានភាពសុខដុមរមនានៅក្នុងព្រះរាជាណាចក្រកម្ពុជា ជូនដល់សិក្ខាកាមជាមន្ត្រីនគរបាលទាំងអស់។ 

ទន្ទឹមនឹងនេះ ឯកឧត្តម សោម ចំណានមានប្រសាសន៍លើកឡើងថា សិទ្ធិធ្វើកូដកម្ម និងធ្វើបាតុកម្មដោយសន្តិវិធីត្រូវបានធានាដោយរដ្ឋធម្មនុញ្ញ នៃព្រះរាជាណាចក្រកម្ពុជា។ មាត្រា៣៧ នៃរដ្ឋធម្មនុញ្ញចែងថា “សិទ្ធិធ្វើកូដកម្ម និងធ្វើបាតុកម្មដោយសន្តិវិធីត្រូវយកមកអនុវត្តនៅក្នុងក្របខណ្ឌនៃច្បាប់”។ នៅក្នុងការអនុវត្តជាក់ស្តែង យើងសង្កេតឃើញថា កូដកម្មច្រើនតែកើតឡើង បន្ទាប់ពីកម្មករនិយោជិត និងនិយោជកមិនអាចស្វែងរកដំណោះស្រាយទៅលើវិវាទការងាររួម ដែលកើតមានឡើងនៅក្នុងសហគ្រាស គ្រឹះស្ថានរបស់ខ្លួន ហើយក្នុងករណីខ្លះ កូដកម្មមួយចំនួនបានប្រែក្លាយទៅជាកូដកម្មខុសច្បាប់ ឬបាតុកម្មហិង្សា ដែលចាំបាច់ទាមទារឱ្យមានការអន្តរាគមន៍ពីអាជ្ញាធរមានសមត្ថកិច្ច និងមន្ត្រីនគរបាលយុត្តិធម៌។ ដើម្បីធានាការអនុវត្តសិទ្ធិធ្វើកូដកម្ម និងធ្វើបាតុកម្មដោយសន្តិវិធីប្រកបដោយប្រសិទ្ធភាព ស្របតាមបទប្បញ្ញត្តិច្បាប់ជាធរមាន និងអនុសញ្ញាអន្តរជាតិដែលកម្ពុជាបានផ្តល់សច្ចាប័ន ការលើកកម្ពស់ការយល់ដឹងរបស់គ្រប់ភាគីពាក់ព័ន្ធក្នុងការអនុវត្តសិទ្ធិទាំងនេះ គឺជាការចាំបាច់។ 

ឯកឧត្តមអនុរដ្ឋលេខាធិការ លើកបញ្ជាក់ថា លក្ខខណ្ឌការងារល្អប្រសើរ និងសុខដុមនីយកម្មនៃទំនាក់ទំនងវិជ្ជាជីវៈ គឺជាមូលដ្ឋានគ្រឹះនៃការអភិវឌ្ឍវិស័យការងារប្រកបដោយចីរភាព។ ក្នុងន័យនេះ ក្រសួងការងារនិងបណ្តុះបណ្តាលវិជ្ជាជីវៈបានធ្វើការកែទម្រង់នូវប្រព័ន្ធអធិការកិច្ចការងារ ពង្រឹងការអនុវត្តច្បាប់ស្តីពីការងារ និងច្បាប់ស្តីពីសហជីព ធ្វើឱ្យលក្ខខណ្ឌការងារ និងទំនាក់ទំនងវិជ្ជាជីវៈ កាន់តែមានភាពប្រសើរឡើង។ ជាក់ស្តែង តាមរយៈការអនុវត្តច្បាប់ស្តីពីសហជីព ចំនួន អង្គការវិជ្ជាជីវៈ ដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈ មានចំនួនសរុប ៥ ១១៧ គិតត្រឹមខែសីហា ឆ្នាំ២០១៩ ក្នុងនោះ សហជីពមូលដ្ឋានចំនួន ៤ ៨៧៣, សហព័ន្ធសហជីពចំនួន ២០២, សហភាព សហជីពចំនួន ៣១ និងសមាគមនិយោជកចំនួន ១១។ បន្ថែមពីលើនេះ ការដោះស្រាយវិវាទការងារ ក៏ទទួលបានប្រសិទ្ធភាព ដោយចំនួនវិវាទការងាររួមមានការថយចុះ ខណៈដែលចំនួនកូដកម្មក៏មានការថយចុះផងដែរ។ 

គួរកត់សម្គាល់ផងដែរថា ការដោះស្រាយវិវាទការងាររួមដោយក្រុមប្រឹក្សាអាជ្ញាកណ្តាលទទួលបានលទ្ធសះជា ក្នុងអត្រា៧០%។ ក្នុងឆ្នាំ២០១៨ កូដកម្មមានចំនួន៤៧ករណី ថយចុះ ៥០ករណី បើធៀបនឹងឆ្នាំ២០១៧។ ក្នុងឆ្នាំ២០១៩ មានកូដកម្មចំនួន៣៥ករណី គិតត្រឹមដំណាច់ខែសីហា៕


ឯកសារផ្លូវការ